D Lauren Bacall [ˌlɔrən bəˈkɔːl] (* 16. Septämber 1924 in dr Stadt Nöi York, Nöi York, as Betty Joan Perske; † 12. August 2014[1] z Nöi York[2]) isch en amerikanischi Schauspiilere gsi.
Si het zu de letschte Kinolegände vo dr „goldige Era“ vo Hollywood ghäärt und het wääred irer Filmkarriere, wo fast siibe Joorzäänt duurt het, an dr Site vo Liinwandgröössene wie iirem Maa Humphrey Bogart, John Wayne, Rock Hudson, Gary Cooper, Marilyn Monroe, Tony Curtis oder Kirk Douglas gspiilt.
Zu iire berüemtiste Film ghööre iire erst Film Haben und Nichthaben (1944), d Thriller Tote schlafen fest (1946) und Gangster in Key Largo (1948), d Liebeskomödie Wie angelt man sich einen Millionär? (1953) und dr Film Liebe hat zwei Gesichter (1996), wo si drfür dr Golden Globe Award und en Oscar-Nominierig überchoo het.
In de 1970er Joor het d Bacall au im Theater am Broadway groossi Erfolg ghaa. Für iiri Daarstellige in de Miusikl Applause und Woman of the Year het si zwäi Tony Awards überchoo.
S American Film Institute het sä 1999 zu de 25 grösste wiiblige Filmstars gweelt.[3] Im Joor 2009 het d Lauren Bacall dr Eerenoscar für iir Lääbenswärk überchoo.
D Lauren Bacall isch e Cousine gsi vom israelische Politiker und Staatspresidänt Schimon Peres.
© MMXXIII Rich X Search. We shall prevail. All rights reserved. Rich X Search